Haustið í Holtakoti

Nú er vetrarstarfið komið í gang og gengur ljómandi. Það verða 37 börn í skólanum í vetur og hefur hópur yngstu barna ekki verið fjölmennari í manna minnum. Þau hafa aðlagast vel og leika við hvern sinn fingur. Eldri börnin eru farin að heimsækja vinnustaði foreldranna og gera ýmsar tilraunir. Í vetur ætlum við að vinna í námslotum þar sem hver námsþáttur er tekinn fyrir í 5 vikur og og unnið með hann á fjölbreyttan hátt. Þannig er auðvelt og skemmtilegt að taka fyrir ákveðin þemu og vinnan með þau verður markvissari. Þetta er líka tilraun til að létta vinnu kennara. Við sjáum hvernig til tekst en þetta lofar góðu. Það gerir líka verkefnið okkar Hugarró. Flest börnin, fullorðna fólkið reyndar líka, eru að ná góðri slökun í hádegisstundinni og jafnvel oftar yfir daginn. Ekki veitir af því það þarf að nota mikla orku í 8-8,5 klst. leikskóladag!

Bókavika í tilefni af degi læsis, 8. september

Í vikunni 3. – 7. september var lögð mikil áhersla á bækur og bókalestur í tilefni af degi læsis sem er 8. september ár hvert. Í upphafi vikunnar fóru öll börn leikskólans heim með inneignarmiða sem hvetja til lesturs. Á þriðjudeginum voru búin til bókamerki og á miðvikudeginum gerðust börnin rithöfundar og bjuggu til bók og myndskreyttu. Á fimmtudeginum fóru öll börn heim með hálsmen sem á stóð „viltu lesa fyrir mig“ og á föstudeginum voru hegndar upp bækur í útiverunni.
Þetta var ljómandi skemmtileg og fræðandi vika.

Hér að neðan má sjá nokkrar myndir

Mynd frá Hulduheimar Sel.Mynd frá Hulduheimar Sel.

Við erum mætt í skólann!

Eins og sumarfríið er gott þá er líka gott að komast aftur í skipulagið. Það á bæði við um börn og fullorðna, ekki satt?

Vonandi hafið þið haft það gott í sumar kæru foreldrar og börn. Þessa vikuna erum við að aðlaga ný börn inn í skólana og það fer ljómandi vel af stað. Við byrjum rólega, notum hverja góðviðrisstund til útiveru og í ágúst eru báðir skólar með þemavikur þar sem börnin skoða og vinna með steina, blóm skordýr ofl. Um miðjan september hefjum við svo skipulagt starf.

 

Sumarlokun og aðlögun nýrra barna

Tíminn flýgur og áður en við vitum af er komið sumar og 20 stiga hiti!

Við förum í sumarfrí föstudaginn 22. júní og opnum aftur 23. júlí kl. 10.00.
Aðlögun nýrra barna hefst svo þriðjudaginn 24. júlí kl.9.00. Þá koma flest börnin inn en við innritum 11 börn í Kot og 15-16 í Sel. Fækkað verður í báðum skólum næsta skólaár frá því sem var í vetur. Gaman er að segja frá því að við fáum nokkur systkini til okkar í sumar í báða skóla eins og reyndar undanfarin ár. Alltaf gaman að fá systkini í hópinn 🙂

Söngvaflóð í Hofi á Degi leikskólans 6. febrúar

Söngvaflóðsskemmtun

Á degi leikskólans, 6. febrúar munu tveir elstu árgangarnir syngja í Hofi á sameiginlegri söngskemmtun leik- og tónlistarskóla Akureyrar. Foreldrum og bæjarbúum er boðið að koma og hefst söngstundin klukkan 10:00. Börnin frá Hulduheimum verða auðkennd með bláum hárböndum.

Eftir hádegisslökun gerum við okkur glaðan dag í skólanum, Þóranna og Anna María eru vísar með að baka eitthvað gómsætt handa okkur og við skemmtum okkur eins og aðra
daga á einn eða annan hátt.                                                   

Jólakveðja

Við óskum ykkur öllum gleðilegra jóla og farsældar á nýju ári. Hlökkum til að eiga gott samstarf á árinu 2018, árinu sem við ætlum að læra að slaka á og njóta augnabliksins.
Við ætlum að feta fyrstu skrefin með börnunum í verkefninu okkar „Hugarró – núvitund og hugleiðsla í leikskóla“, njóta lífsins og kynnast fullt af nýjum og spennandi verkefnum.

Skólinn er lokaður 02. janúar vegna starfsdags en við sjáumst hress og kát þann 03. janúar 2018.

Steinavika

Sumarnámskráin hjá okkur í Seli einkennist af þemavikum af ýmsum toga. Dagana 19. – 23. júní var steinavika en þá var farið í fjöruferð og gersemar hennar skoðaðar.

Börnin máttu velja sér steina til að hafa með í leikskólann og í útiveru máluðu börnin steinanna í öllum regnbogans litum. Punkturinn yfir i-ið var steinaleit í garðinu en þá höfðu kennarar falið alla steinanna og var það í höndum barnanna að finna þá og flokka eftir litum. Vakti þetta mikla lukku meðal barna og kennara og reyndi leitin ansi mikið á þrautseigjuna því ekki voru allir steinarnir faldir á auðveldum stöðum.

 

                          

1 2 3 4 59